टिकौली चौरमा कृष्णसार ल्याउने प्रक्रिया अन्तिम चरणमा

March 18, 2024
- ADVERTISEMENT -

रत्ननगर । नेपालमा अतिदुर्लभ मानिएको कृष्णसार टिकौली चौरमा ल्याउने प्रक्रिया अन्तिम चरणमा पुगेको छ । रत्ननगर नगरपालिकाको संरक्षकत्व र व्यवस्थापनमा सञ्चालन हुन लागेको कृष्णसार संरक्षण तथा व्यवस्थापन समितिको निर्णयअनुसार विद्युतीय तारबार (इलेक्ट्रिक फेन्स लाइन) जडान कार्य सम्पन्न भएसँगै कृष्णसार स्थानान्तरण गर्ने प्रक्रिया अन्तिम चरणमा पुगेको हो ।

रत्ननगरको टिकौली चौर (रत्ननगर महोत्सव लाग्ने खाली चौर)मा १९.८३ हेक्टर क्षेत्रफलमा बासस्थानको सुरक्षार्थ विद्युतीय तारबारको काम सम्पन्न भैसकेको छ । कृष्णसारलाई सुरक्षित तरिकाले राख्नका लागि खगेरी खोलाबाट पश्चिमतर्फको खाली मैदानमा पोल ठड्याएर तारजालीको पूर्वाधार निर्माणको काम सम्पन्न भएको नगरपालिकाले जनाएको छ । पूर्वाधार निर्माणका लागि रत्ननगर नगरपालिकाको आर्थिक वर्ष २०८०/८१ को बजेटबाट एक करोड ५५ लाख पाँच हजार ९१६ रूपैयाँ लागत खर्च भैसकेको पूर्वाधार शाखाका इन्जिनियर शंकरबहादुर कुँवरले जानकारी दिए । उनका अनुसार नौ लाख रूपैयाँबराबरको लागतमा जिल्ला वन कार्यालय चितवनले कृष्णसारलाई पानी पिउनका लागि पोखरी निर्माण गरिदिएको छ ।

- ADVERTISEMENT -

Advertisement

राष्ट्रिय निकुञ्ज तथा वन्यजन्तु संरक्षण विभागबाट कृष्णसार स्थानान्तरण गर्ने निर्णय भइसकेकोले अब ल्याउने प्रक्रिया मात्र बाँकी रहेको इन्जिनियर कुँवरले बताए । रत्ननगरको गौरवको योजनाअन्तर्गत छवटा भाले र १२ पोथी गरी १८ वटा कृष्णसार स्थानान्तरण गर्ने प्रक्रिया अन्तिम चरणमा पुगेको र विद्युतीय तारबार जडान कार्यसमेत सम्पन्न भैसकेको नगरप्रमुख प्रलाद सापकोटाले बताए । यही चैत ७ गतेदेखि इलेक्ट्रिक फेन्स लाइनमा विद्युत् प्रसारण गरिने भएकाले सो क्षेत्रमा प्रवेश नगर्न नगरवासीलाई उनले आग्रह गरेका छन् ।

नगरवासीलाई सचेतनाका लागि जरूरी सूचना प्रकाशित÷प्रसारित गरिसकिएको उनले जानकारी दिए । रत्ननगर नगरपालिकास्थित बरान्डाभार संरक्षित वनअन्तर्गतको दक्षिण–पूर्वी भागमा पर्ने १९.८३ हेक्टर वनक्षेत्र यस योजनाले समेटेको छ । यस क्षेत्रको उत्तर र पश्चिमतर्फ बरान्डाभार संरक्षित वनक्षेत्रमा पर्दछ भने दक्षिणमा पूर्व–पश्चिम राजमार्ग रहेको छ । पूर्वमा खगेरी खोला तथा पञ्चकन्या सामुदायिक वन रहेको छ ।

- ADVERTISEMENT -