प्रधानमन्त्री ओलीद्वारा पार्टी एकताको आव्हान

60

काठमाडौं | प्रधानमन्त्री तथा नेकपा एमालेका अध्यक्ष केपी शर्मा ओलीले पार्टी बलियो भयो भने मात्र देशको लोकतन्त्र सुदुढ र राष्ट्र एकतावद्ध हुन सक्ने भन्दै एकताका लागि पुनः आव्हान गर्नुभएको छ । ओलीले आइतबार एक अपिल जरी गरी पार्टीलाई २०७५ साल जेठ ३ गते पूर्वको अवस्थाबाट अगाडि बढाइने प्रतिवद्धता पनि व्यक्त गर्नु भएको हो ।

नेता माधवकुमार नेपाल तथा झलनाथ खनाल पक्षले पार्टी एकता अब सम्भव नरहेको अभिव्यक्ति दिइरनुभएका बेला अध्यक्ष ओलीले आइतबार अपरान्ह पार्टीको नाममा एकता आव्हान गर्नु भएको हो । उहाँले आफू सदैव पार्टी एकताको पक्षमा रहेको दोहोर्‍याउनुभएको छ ।

‘नेकपा एमालेको निर्माण र विकासमा हजारौं योद्धाहरुको पसिना, त्याग र बलिदान अन्तरनिहित छ, यस पार्टीप्रति जनताको अपार विश्वास छ’ प्रधानमन्त्री ओलीको भनाइ छ–‘एमालेलाई सुदृढ गरेर मात्रै कम्युनिष्ट आन्दोलनलाई बलियो र एकतावद्ध बनाउन सकिन्छ ।’

प्रधानमन्त्री ओलीले आव्हान पत्रमा भन्नु भएको छ–‘म सधैंभरी कम्युनिष्ट आन्दोलनको एकता, लोकतान्त्रिक शक्तिहरुको एकता र राष्ट्रिय एकताको पक्षमा रहँदै आएँ । भोलिका दिनमा पनि म यसैका निम्ति क्रियाशील रहने छु ।’

कम्युनिष्ट आन्दोलनलाई एकतावद्ध बनाएर मात्रै मुलुकको राष्ट्रिय एकतालाई सुदृढ गर्न सकिन्छ भन्ने भन्ने विश्वासका साथ २०७५ जेठमा पार्टी एकीकरण गरिएको उहाँले स्मरण गर्नुभएको छ ।

पार्टी एकताका लागि आफू २०७५ जेठ ३ अघि पार्टीको गतिविधिमा फर्काउन तयार रहेको अध्यक्ष ओलीले आव्हान पत्रमा उल्लेख गर्नुभएको छ । साथै यसबीचमा भएका कमजोरी र गल्तीमा कुनै कारवाही नगरिने प्रतिवद्धता पनि व्यक्त गर्नु भएको छ ।